Aviadu su cursu de formatzione in limba sarda – Annu 2025
Su 30 de abrile sunt comintzadas sas letziones de su cursu de formatzione in limba sarda chi si faghet in s’Universidade de sa Tertza Edade de Bosa.
Giai dae carchi annu s’Ufìtziu Limba Sarda est collaborende cun UniTre pro sa promotzione de sa limba sarda. In su 2023, cun sos “Laboratòrios pro faeddare”, sas operadoras ant atobiadu onni chida unu bellu grupu de iscritos de UniTre pro resonare in sardu subra de argumentos de onni genia, dae sa linguìstica a s’istòria a sas traditziones…
In su 2024 at mòvidu su primu cursu de alfabetizatzione in sardu, chi est andadu bene meda e chi sighit ocannu cun sa bellesa de 38 iscritos (prus de su dòpiu de ocannu passadu). Dotzente de sos cursos est sa dotora Gianfranca Piras.
Su grupu de corsistas est rapresentativu de sas biddas de Pianalza: b’at iscritos chi benint dae Bosa, Magumadas, Sàgama, Sune, Tresnuraghes e finas dae Cùglieri, Sindia e Aristanis.
Si bi podent intèndere limbàgios rapresentativos de totu sa Sardigna, ca b’at gente originària de Casteddu, de Cossoine, de Ilartzi, de Itiri, de Silanos, de Silìcua, de Ulìana e non mancant sos furisteris interessados a imparare sa limba nostra.
Un’esperièntzia bella meda, chi permitit onni borta unu cunfrontu e un’iscàmbiu profetosos pro totus.
