Eventi

Su materiale didàticu aprontadu pro s’annualidade 2023

Comente costumat giai dae paritzos annos, ocannu puru s’Ufìtziu Limba Sarda at aprontadu materiale didàticu in sardu de dare a sas iscolas. Amus bidu, difatis, chi custa est una modalidade profetosa meda, ca sos pitzinnos s’ispassiant cun sas ischedas didàticas e sos mastros (e genitores) tenent un’agiudu in prus cando cherent imparare su sardu a sos prus piticos.

Ocannu amus seberadu duos argumentos diferentes: Maria Giovanna at aprontadu unas cantas ischedas didàticas de giogos linguìsticos (paràulas in rughe, crucipuzzle, rebus…), Gianfranca at seberadu una bintina de ditzos antigos aprontende esertzìtzios pro chi sos pitzinnos los imparent gioghende.

In custos annos, amus bidu chi pitzinnos e mannos impreant cun praghere custu materiale didàticu e lu custoint in sos annos. Isperamus e auguramus chi su de ocannu puru siat profetosu pro s’imparu de sa limba nostra.

Gianfranca e Maria Giovanna

Materiales de su cursu de limba sarda annu 2024

Est imbàtidu a sas ùrtimas dies su cursu de limba sarda aprontadu dae s’Unione de Comunes de Pianalza cun su dinari de sa Lege 482/1999.

Su cursu (15 letziones de 2 oras) at tratadu de limba faeddada e de limba iscrita, in una modalidade laboratoriale chi at permìtidu a sos corsistas de imparare non solu dae sa dotzente ma finas dae sos cumpàngios de biàgiu.

Publicamus inoghe sa dispensina chi ponet paris sas normas ortogràficas de base pro iscrìere in sardu sena de errores, e finas unos cantos testos postos a disponimentu dae sos corsistas matessi, chi si sunt fatos parte ativa de custu caminu e chi ringratziamus pro s’impignu issoro.

Chie cheret podet iscarrigare sa dispensina dae su link in fundu.

Sos ditzionàrios de limba sarda

Non totus connoschent sos trastos de manìgiu pro impreare sa limba sarda e nos ant pedidu un’agiudu cuncretu pro comintzare a l’impreare e a l’iscrìere, duncas amus pensadu de aprontare unu vademecum sintèticu chi guidet a sa connoschèntzia de sos ditzionàrios printzipales de limba sarda.

Chie nde tenet praghere lu podet iscarrigare dae su link chi sighit.

(gf.p.)

Torrant a comintzare sas atividades de s’Ufìtziu Limba Sarda

Est torra operativu s’Ufìtziu Limba Sarda de s’Unione Comunes de Pianalza.

Sas operadoras Gianfranca Piras e Maria Giovanna Serchisu sunt a disponimentu de su pùblicu su lunis e su mèrcuris dae sas noe a sas duas (h 9-14) pro consulèntzias in contu de limba sarda, didàtica de su sardu, produtzione de materiale pro sas iscolas etc.

S’8 de marzu 2024 ant a comintzare finas sas atividades de formatzione, chi ocannu s’ant a fàghere cun sos pitzinnos de s’iscola mèdia de Bosa e cun s’Universidade de sas Tres Edades, sighende sa collaboratzione bella comintzada in s’annualidade passada.

Totu sas atividades in cantieri sunt finantziadas dae sa Regione Sardigna pro mesu de s’avisu “TuLIS – Tutela Lingue Sarde” (L. 482/1999 artt. 9 e15; L.R. 22/2018 art. 10, comma 5; L.R. 6/2012 art. 2, comma 13 – Annualidade 2023).

Sos libros de Nadale e de sas Festas

Mèrcuris 13, giòbia 14 e chenàbura 15 de nadale sas operadoras de s’Ufìtziu Limba Sarda de s’Unione Pianalza paris cun sos sìndigos de su territòriu ant dadu a sos pitzinnos de iscola unos cantos libros in sardu pro lis fàghere sos augùrios de Nadale.

Sos libros distribuidos sunt duos: Nadale in allegria (a sas iscolas de s’infàntzia, a sos asilos e a sa classe 1° elementare) e Festas – A onni istajone sa festa sua (a sos pitzinnos de 2°, 3°, 4° e 5° elementare).

Custos libros sunt nàschidos dae un’esigèntzia essida a campu faeddende cun sos mastros, chi bortas meda ant pedidu a s’ULS materiale didàticu in sardu tenende dificultade a nd’agatare. S’ULS at pensadu, duncas, de l’aprontare inventende.lu a nou o adatende e bortende in sardu materiales agatados in Internet, pro fàghere unu servìtziu nàschidu dae un’esigèntzia chi esistit dae annos meda.

In sos duos libros b’est totu su chi podet bisongiare a unu mastru pro faeddare de su Nadale e de sas  festas nòdidas de s’annu. B’at ischedas de colorare e de cumpletare, poesias, contos e teatrinos pro chi sos pitzinnos imparent a impreare su sardu cun praghere e ispàssiu.

A dolu mannu, essende pagas sas còpias, sos mastros non nd’ant retzidu e pro custa resone publicamus sos files in PDF, pro chi chie cheret los potzat iscarrigare e impreare.

Si torrat gràtzias a su dirigente e a totu sos mastros pro sa disponibilidade manna, in s’isetu de pòdere collaborare finas in àteras ocasiones.

Seletzione pùblica pro 7 figuras professionales

Su responsàbile de Àrea Amministrativa de s’Unione de Comunes de Pianalza dat a ischire chi est aprovadu su bandu de seletzione pùblica ùnica pro aprontare un’elencu de persones abilitadas pro las assùmere a tempus indeterminadu in s’orgànicu de s’Unione e de sos Comunes aderentes.

Sos profilos professionales sunt sos chi sighint:

– Istrutore amministrativu contàbile, àrea de sos istrutores (sa chi si naraiat “Categoria C”), a tempus indeterminadu partziale e/o cumpletu;

– Istrutore diretivu amministrativu, àrea de sos funtzionàrios (sa chi si naraiat “Categoria D”), a tempus indeterminadu partziale e/o cumpletu;

– Istrutore diretivu contàbile, àrea de sos funtzionàrios (sa chi si naraiat “Categoria D”), a tempus indeterminadu partziale e/o cumpletu;

– Istrutore tècnicu, àrea de sos istrutores (sa chi si naraiat “Categoria C”), a tempus indeterminadu partziale e/o cumpletu;

– Istrutore diretivu tècnicu, àrea de sos funtzionàrios (sa chi si naraiat “Categoria D”), a tempus indeterminadu partziale e/o cumpletu;

– Istrutore diretivu operadore sòtziu-assistentziale, àrea de sos funtzionàrios (sa chi si naraiat “Categoria D”), a tempus indeterminadu partziale e/o cumpletu;

– Operaju tècnicu manutentivu ispetzializadu, àrea de sos operadores espertos (sa chi si naraiat “Categoria B3”), a tempus indeterminadu partziale e/o cumpletu.

Sos cuntratos sunt a tempus indeterminadu cun oràriu cumpletu o partziale. Totu sas informatziones si podent agatare in su bandu publicadu in su situ istitutzionale de s’Unione Pianalza (https://www.unioneplanargia.or.it/), in sa pàgina printzipale e in sa setzione “Amministrazione trasparente – Bandi di concorso”.

Sas domandas cherent mandadas telematicamente, intro de mesanote (h 23,59) de su 24/10/2023, cumpilende sos mòdulos chi s’agatant in custu link: https://www.inpa.gov.it/bandi-e-avvisi/dettaglio-bando-avviso/?concorso_id=28e1ebfc01c445b38293096cfec1c3b8.

“Narat su ditzu” – Ischedas pro imparare carchi ditzu a sos pitzinnos

Sos ditzos sunt espressione de sas comunidades chi los ant creados; narant veridades universales e dant cussìgios sàbios, movende dae sa vida de onni die de una sotziedade chi oe no esistit prus.

Sunt imbàtidos a nois mustrende sa “fotografia” de sa vida de sos tempos colados e mantenende paràulas antigas chi oe non si narant prus ma chi abarrant in su ditzu in formas “cristallizadas”, comente fòssiles.

Nos paret importante chi sa gioventude no los ismèntighet e amus pensadu de fàghere una sèrie de ischedas pro imparare a sos pitzinnos de oe sa sapièntzia de eris.
Publicamus in fatu unu libreddu chi cuntenet una vintina de ditzos antigos, in una sèrie de ischedas in ue sos pitzinnos si podent ispassiare gioghende cun sas paràulas e cun sas frases.

(GF.P.)